裝修玩味感十足嘅HeSheEst💕桃紅色嘅主調有一種迷人嘅感覺。HeSheEat有甜品專門店成功轉型為全面嘅西餐廳，今日我就去咗旺角分店食晚餐。
燒烤BB豬肋骨配日式薯仔沙律
豬肋骨已經煮到好「林」身，切嘅時候好方便，燒烤醬配合得好好，醬汁冇掩蓋肉香。特別要講下呢個薯仔沙律，好香嘅忌廉味，食完唔會好濟。
黑松露雜菌春雞燴意大利飯
有兩大隻燒雞髀，但係雞肉有少少乾身。不過意大利飯係選用正宗嘅意大利米，黑松露嘅份量都幾多，每一啖好有咬口，整體來講評價都幾好。但係煮呢個飯需時，如果大家要食嘅話要預多少少時間。
燒烤雞肉沙律
成個沙律整到好似一個蛋餅咁靚，雞肉肉質爽口，而且有四五種沙律菜伴碟，一份可以幾個朋友share都冇問題。
Oreo奶昔
成杯都係Oreo碎，勁濃郁嘅奶昔。
白桃白茶
想飲得清淡啲嘅女生們可以選擇，白茶清淡香口，而且入邊仲有白桃果肉可以食。
HeSheEat已經食過無數次，但係都唔會厭。價錢又唔貴，大家得閒都去試吓啦。
HeSheEat (旺角)
旺角白布街22號藝興大廈地下4號舖
#hesheeat
Search